Loading...

राजतन्त्र र हिन्दूराष्ट्र फर्काउने संकल्पसहित राप्रपाको घोषणापत्र सार्वजनिक

Published Date: November 7, 2017

काठमाडौं, कात्तिक २१ । राष्ट्रिय प्रजातन्त्र पार्टीले ‘राजसंस्थासहितको लोकतन्त्र’ का पक्षमा रहने भन्दै आसन्न प्रतिनिधि र प्रदेश सभाको घोषणापत्र सार्वजनिक गरेको छ ।

राप्रपाले राजतन्त्र र हिन्दूराष्ट्र फर्काउने संकल्पसहितको चुनावी घोषणापत्र ल्याएको हो । ललितपुरमा मंगलबार पत्रकार सम्मेलन गरी सार्वजनिक गरिएको घोषणा पत्रमा नेपालको भूराजनैतिक अवस्था एवं धार्मिक सामाजिक सांस्कृतिक परिवेशको पृष्ठभूमिमा चुनावी राजनीतिभन्दा माथि रहेको तथा सबैले सम्मान र विश्वास गर्ने एउटा साझा संस्थाको आवश्यक पर्ने जिकिर गरिएको छ ।

सार्वभौमसत्ता जनतामा निहीत रहने, देशको शासन जनताबाट निर्वाचित प्रतिनिधिले गर्ने तथा संसदको परिधि र संविधानअन्तर्गत राष्ट्रियता र सांस्कृतिक एकताको प्रतीकको रुपमा संवैधानिक राजसंस्था रहने उसको भनाइ छ ।

राष्ट्रियता, सनातन धर्म, राजसंस्थासहितको लोकतन्त्र, सुदृढ स्थानीय स्वायत्त शासन प्रणाली, असंलग्न परराष्ट्र नीति र सामाजिक न्याय तथा समावेशी सिद्धान्तलाई पार्टीको वैचारिक आधारस्तम्भका रूपमा आत्मसात गरिएको हो ।

राप्रपाले दश वर्षभित्रै मुलुकमा १० हजार मेघावाट जलविद्युत उत्पादन गर्ने लक्ष्य राखेको छ । एक घर एक रोजगारीको अवधारणा कार्यान्वयन गरिने, महिलाको सुरक्षा, स्वाभीमान, सम्मान र समानताका लागि सशक्तीकरणलाई उच्च प्राथमिकता दिनेलगायतका विषय घोषणा पत्रमा उल्लेख छ ।

यस्तो छ राप्रपाको घोषणापत्रको पुर्णपाठ :

१. राष्ट्रिय अखण्डता, सार्वभौमिकता, एकता एवं स्वतन्त्रताको संरक्षणप्रति राप्रपा सदैव सचेत र प्रतिवद्ध रहने छ ।
२. सुन्दर, सबल, समतामुलक एव समृद्ध राष्ट्र नेपाल निर्माण गर्ने लक्ष्य प्राप्तिका निमित्त राप्रपाले सनातन हिन्दुराष्ट्र, राजसंस्था सहितको लोकतन्त्र, सुदृढ स्थानीय स्वायत्त शासन प्रणाली र आर्थिक उदारवादलाई चार प्रमुख बैचारिक आधारस्तम्भका रुपमा आत्मसात गरेको छ ।
३. जनता विना राष्ट्रको परिकल्पना हुन सक्दैन । जनता राष्ट्रका आत्मा हुन् । राष्ट्रियता बलियो हुन राष्ट्र बलियो हुनु पर्दछ , अनि राष्ट्र बलियो हुन जनता बलियो हुनु पर्दछ । जनतालाई बलियो बनाउनु भनेको प्रजातन्त्रलाई बलियो बनाउनु हो । त्यसैले, नेपालको संविधान (२०७२) को परिधिभित्र रही लोकतान्त्रिक विधि र प्रकृयाबाट जनमन जिति नेपालमा सामाजिक, आर्थिक एवं राजनीतिक रुपान्तरण गर्नु नै राप्रपाको अभीष्ठ हो । यही महान् लक्ष्य सहित राष्ट्रियताको संरक्षण, प्रजातन्त्रको सुदृढीकरण एवं नेपाली जनताको आर्थिक समृद्धिको चाहना परिपूर्तिका लागि राप्रपा तपसिलका संकल्पहरु गर्दछ र Mission Mode को रुपमा अगाडि बढ्ने प्रण गर्दछ । त्यसैले, हामी, राप्रपा ः
१. सबै धर्मका बिचमा समानता र पूर्ण धार्मिक स्वतन्त्रता सहितको नेपाली पहिचानको रुपमा सनातन धर्मसापेक्ष हिन्दु राष्ट्र पुनस्र्थापना गर्छौ ।
२. दीर्घकालीन महत्व राख्ने राष्ट्रिय विषयहरुमा जनताको राय वुझ्न जनमत संग्रहको विधि अबलम्बन गर्छौ ।
३. महिलाको सुरक्षा, स्वाभिमान, सम्मान र समानताकोलागि सशक्तीकरणलाई उच्च प्राथमिकता दिने छौ ।
४. नेपाल बन्दजस्ता कार्यक्रमहरु कहिले पनि गर्ने छैनौ ।
५. नेपालको राष्ट्रियतामा आंच आउने कुनै कार्य गर्ने छैनौं र राष्ट्रिय स्वाधीनताको विषयमा कसैसंग कुनै सम्झौता गर्ने छैनौं ।
६. अल्पसंख्यकहरुको सुरक्षा र संरक्षणमा सदैव लागिरहने छौ ।
७. स्वास्थ्य सुविधालाई पहुचँयोग्य, गुणात्मक, सस्तो एवं सर्वसुलभ वनाउने छौ ।
८. राष्ट्रिय सुरक्षा, सार्वजनिक हित र वातावरणीय संरक्षणको निमित्त आवश्यक देखिएका बाहेक अन्य सबै आर्थिक क्रियाकलापवाट राज्यको संलग्नता क्रमशः हटाउर्दैँ लाग्ने छौ ।
९. ग्रामीण इलाकामा बैक शाखा विस्तार गर्ने र प्रत्येक नागरिकको बैक खाता खोल्ने व्यवस्था गर्नेछौं ।
१०. रुग्ण एवं वन्द भएका औधोगिक प्रतिष्ठानहरुलाई पुनसंचालन गर्नेछौं ।
११. काठमाण्डौको बीर अस्पताल सरहका अस्पताल सातै प्रदेशमा निर्माण गर्नेछौं ।
१२. शैक्षिक क्षेत्रमा विद्यमान पार्टीकरण र भागवण्डालाई अन्त्य गर्ने छौ र शिक्षालाई राजनीतिको प्रत्यक्ष प्रभावबाट मुक्त तुल्याउने छौ ।
१३. एक घर एक रोजगारीको अवधारणा कार्यान्वन गर्नेछौं ।
१४. सदाको लागि लोडसेडिंग अन्त्य गर्नेछौं ।
१६. आर्थिक तथा व्यावसासयक क्षेत्रमा सिण्डिकेट प्रथा र कार्टेलिंगलाई निरुत्साहित गर्नेछौं ।
१७. जलश्रोतको एकीकृत विकासको लागि एकिकृत जलस्रोत मन्त्रालयको पुनस्र्थापना गर्नेछौं ।
१८. अपराधीको राजनीतिकरण र राजनीतिलाई अपराधीकरणबाट पूर्णतः मुक्त राख्न कटिबद्ध छौं ।
१९. प्रशासनलाई राजनीतिकरणको प्रकोपबाट पुर्णतः मुक्त तुल्याउने छों ।
२०. राष्ट्रिय स्वार्थ र स्वाभिमान रक्षाको लागि असंलग्न परराष्ट्र नीति अवलम्वन गछौं ।
२१. बिदेशी लगानी अभिवृद्धिका निमित्त आर्थिक कुटनीतिलाई जोड दिनेछौं ।
२२. आर्थिक वृद्धिदर बढाउन जनमुखि भूमिसुधार लागु गर्नेछौ ।
२३. सबैलाई शिक्षा भन्ने मान्यता अनुरुप विद्यमान शिक्षा प्रणालीमा आमूल सुधार गर्न तत्काल ूराष्ट्रिय शिक्षा सुधार आयोगू गठन गर्नेछौं ।
२४. उच्च शिक्षा आर्जन गर्न चाहने गरीब तर जेहन्दार विद्यार्थीलाई विनाधितो दीर्घकालीन शैक्षिक ऋण पाउने व्यवस्था गर्नेछौं ।
२५. प्रत्येक नागरिकको जिऊ–धनको सुरक्षाको ग्यारेण्टिका साथ कुनैपनि प्रकारका हिंसा र आतंकलाई जरै देखि निर्मुल गर्नेछौं ।
२६. निजी क्षेत्र, सार्वजनिक क्षेत्र र जनताको प्रत्यक्ष साझेदारीमार्फत आर्थिक क्रान्तिलाई अगाडि बढाउँनेछौ ।
२७. प्रत्येक नेपालीले विना कुनै झन्झट÷दुःख÷अवरोध नागरिकताको प्रमाणपत्र पाउनु पर्दछ । कुनै पनि नेपाली नागरिक नागरिकताको प्रमाणपत्र पाउनबाट वंचित नहोस् भन्ने मान्यतालाई दृढता पूर्वक पालना गर्छ ।
२८. पारदर्शिता, जवाफदेहिता र कानुनी राज्यजस्ता मान्यता र सिद्धान्तलाई अबलम्वन गरी भ्रष्टचार शुन्य प्रशासनको प्रत्याभुति दिलाउछौ ।
२९. खेलकुद, साहित्य, कला, संस्कृति र चलचित्रको उत्थानमा विशेष जोड दिनेछौ ।
३०. प्रत्येक नगरपालिकालाई स्मार्ट सिटीका रुपमा बिकास गर्ने छौ
३१. १० बर्षमा १० हाजार मेघावट बिद्युत्त उत्पादन गर्ने योजना कार्यान्वन गर्नेछौ ।
३२. सबै प्रकारका जातीय भेदभाव र शोषणको अन्त्य गर्नेछौ ।
३३. जनकपुर र लुम्बिनीलाई क्रमशः मिथिला र बौद्ध संस्कृतिको वृहत केन्द्रका रुपमा बिकास गर्नेछौ ।
३४. बिदेशमा रहेका नेपाली नागरिकहरुले समेत मताधिकार प्रयोग गर्न पाउने व्यवस्था गर्नेछौ ।
३५. नेपालका आदिवासी जनसमुदायका रुपमा खस आर्य ब्राम्हण क्षेत्री, दशनामी र ठकुरीहरुको अलग पहिचान कायम गर्नेछौ ।
३६. विपन्न परिवारका छोरा छोरी जन्मिना साथ राज्यले प्रतिशिशु एकमुष्ठ रु. ५००० सुपोषण अनुदान प्रदान गर्नेछौ ।
३७. २०० देखि ३०० मेगावाट सम्मका मझौला एवं जलाशययुक्त बहुउद्देशीय जलबिद्युत आयोजनाहरु सातै प्रदेशमा निर्माण गर्नेछौ ।
३८. काठमाण्डौ हेटौडा जोडने सुरुङमार्ग, काठमाण्डौ जुम्ला राजमार्ग, काठमाण्डौ बाहिरी चक्रपथ, तराईको मेची महाकाली हुलाकी राजमार्ग, मध्य पहाडी राजमार्ग, काठमाण्डौ तराई फास्टट्रयाक, मेचीकाली विद्युतीय रेलमार्ग, कोशी तथा नारायणी नदीमा जलमार्ग जस्ता यातायातको संजाल निर्माण गर्नेछौ ।
३९. आर्थिक गतिविधिको व्यापक बिस्तार, सिप विकास, वित्तीय व्यवस्था, स्वरोजगार कार्यक्रम जस्ता कार्यहरुको माध्यमबाट रोजगारीको अवसर सिर्जना गर्ने विशेष कार्ययोजना कार्यन्वन गर्नेछौ ।
४०. राष्ट्रिय सुरक्षाको अन्तिम किल्लाको रुपमा रहेको नेपाली सेनाको परम्परागत गौरवलाई अक्षुग्ण रुपमा कायम राख्दै समय अनुसार सुधार गरिने छ । देशको अखण्डता र सार्वभौमिकताको रक्षाका लागि समयानुकल सीप र दक्षताको अभिवृद्धि गरि सक्षम र सबल राष्ट्रिय सैन्य शक्तिका रुपमा नेपाली सेनाको आधुनिकिकरणमा जोड दिनेछौ ।



Recent Post
Recommendation
आजको भिडियो
Loading...